काठमाडौं, ५ जेष्ठ । नेपाली कम्युनिस्ट पार्टी -नेकपा)का सांसद गणेश विश्वकर्माले आगामी दशकलाई दलित अधिकार दशक घोषणा गर्न सरकारसँग माग गरेका छन् ।
प्रतिनिधिसभामा आगामी आर्थिक वर्षको बजेटका सिद्धान्त र प्राथमिकतामाथिको छलफलमा बोल्दै उनले दलित समुदायको अधिकार सुनिश्चित गर्न विशेष पहल आवश्यक रहेको बताए ।
उनले सरकारले ल्याएको बजेटको सिद्धान्त र प्राथमिकतामा आर्थिक रुपान्तरणको स्पष्ट खाका नभएको टिप्पणी गरे । साथै सुदूरपश्चिमका पहाडी जिल्लामा उच्च गरिबी रहेको उल्लेख गर्दै गरिबी न्यूनीकरणका लागि सेती राजमार्गजस्ता गेम चेन्जर आयोजना अघि बढाउनुपर्नेमा जोड दिए ।
सांसद विश्वकर्माले सुकुम्बासी, भूमिहीन तथा अव्यवस्थित बसोबासीलाई लालपूर्जा वितरण गर्न वैज्ञानिक भूमि सुधार कार्यक्रम लागू गर्न पनि सरकारलाई आग्रह गरेका छन् ।
