काठमाडौं, ४ जेष्ठ । विश्व स्वास्थ्य संगठनले इबोला प्रकोपलाई अन्तर्राष्ट्रिय चासोको सार्वजनिक स्वास्थ्य आपत्काल घोषणा गरेपछि नेपालले पनि सतर्कता बढाएको छ ।
कंगो र युगान्डामा फैलिएको प्रकोपमा २४६ शंकास्पद संक्रमित फेला परेको तथा अप्रिलयता कंगोमा करिब ८० जनाको मृत्यु भएको छ ।
नेपालको महामारी तथा रोग नियन्त्रण महाशाखाले त्रिभुवन अन्तर्राष्ट्रिय विमानस्थलसहित सबै स्वास्थ्य निकायलाई निगरानी कडा बनाउन निर्देशन दिएको छ ।
प्रभावित देशबाट आउने यात्रुको स्वास्थ्य परीक्षणका लागि विमानस्थल हेल्थ डेस्कमा २४सै घण्टा स्वास्थ्यकर्मी खटाइएको जनाइएको छ । जनस्वास्थ्य विज्ञहरूले विश्वव्यापी आवतजावतका कारण नेपाल पनि जोखिममा रहेको बताएका छन् ।
कंगोमा कार्यरत नेपाली शान्ति सैनिकलाई समेत सतर्क रहन निर्देशन दिइएको छ । हालसम्म कुनै नेपालीमा इबोला संक्रमण पुष्टि नभएको नेपाली सेनाले जनाएको छ ।
