काठमाडौं, ४ जेष्ठ । राष्ट्रिय स्वतन्त्र पार्टीका सांसद खगेन्द्र सुनारले संसद्मा कार्यरत पत्रकारहरूको आधारभूत सुविधाको व्यवस्था गर्न माग गरेका छन् ।
सोमबार प्रतिनिधिसभामा बोल्दै उनले संसदीय मामिला रिपोर्टिङमा खटिएका पत्रकारहरूले संसद् गेट बाहिर कठिन अवस्था भोग्नुपरेको भन्दै दुःख व्यक्त गरे ।
उनले पत्रकारलाई कम्तीमा पानी पिउने र शौचालय प्रयोग गर्ने सुविधा उपलब्ध गराउनुपर्ने बताए । वर्षा हुँदा क्यामरा जोगाउन र घाममा बस्नसमेत समस्या भइरहेको उल्लेख गर्दै सुनारले यस्तो अवस्था अन्तर्राष्ट्रिय स्तरमै लाजमर्दो भएको टिप्पणी गरे ।
