काठमाडौं, २ जेष्ठ । नेपालमा पश्चिमी तथा स्थानीय वायुको आंशिक प्रभाव कायम रहेको छ ।
जल तथा मौसम विज्ञान विभागका अनुसार हाल गण्डकी, कर्णाली र सुदूरपश्चिमका हिमाली तथा पहाडी क्षेत्रमा सामान्य बदली रहेको छ भने अन्य क्षेत्रमा आंशिक बदली छ ।
गण्डकीका केही स्थान तथा लुम्बिनी र कोशी प्रदेशका एक–दुई स्थानमा मेघगर्जन र चट्याङसहित मध्यम वर्षा भइरहेको विभागले जनाएको छ ।
आज दिउँसो कोशी, बागमती, गण्डकी र कर्णाली प्रदेशका हिमाली तथा पहाडी क्षेत्रमा सामान्य बदली रहनेछ । ती क्षेत्रका केही स्थानमा मेघगर्जन, चट्याङसहित वर्षा तथा हिमपातको सम्भावना रहेको छ।
मधेश, लुम्बिनी र सुदूरपश्चिमका केही स्थानमा हावाहुरी चल्न सक्ने चेतावनी पनि दिइएको छ । रातिको समयमा पनि कोशी, बागमती र गण्डकी प्रदेशका केही स्थानमा वर्षा र हिमपातको सम्भावना रहने विभागले जनाएको छ।
मधेश र लुम्बिनीका तराई क्षेत्रमा हावाहुरी चल्न सक्ने अनुमान गरिएको छ ।
