काठमाडौं, २२ बैशाख । नेपालले आईसीसी क्रिकेट विश्वकप लिग–२ अन्तर्गत काठमाडौंमा भएको सिरिजको अन्तिम खेलमा ओमानलाई ८१ रनले पराजित गरेका छन् ।
नेपालले दिएको २५७ रनको लक्ष्य पछ्याएको ओमान ३९.५ ओभरमा १७५ रनमै अलआउट भएको छ । गुल्सन झाले उत्कृष्ट बलिङ गर्दै ९ ओभरमा ५ विकेट लिएर जितमा निर्णायक भूमिका खेले ।यसअघि नेपालले ४९.५ ओभरमा सबै विकेट गुमाउँदै २५६ रन बनाएको थियो ।
आसिफ शेखले ९४ रन बनाए भने अर्जुन कुमालले ४८, आरिफ शेखले ४३ र दीपेन्द्र सिंह ऐरीले ३३ रन जोडे । यो जितसँगै नेपालले सिरिजका ४ खेलमध्ये ३ जित्दै ६ अंक जोड्यो र कुल २४ खेलबाट १८ अंकसहित सातौं स्थानमा रह्यो । साथै, ओमानसँगको अघिल्लो हारको बदला पनि लिएको छ ।
