काठमाडौ, १४ वैशाख । नेपाली कांग्रेसले संसदीय दलको नेताका रूपमा भीष्मराज आङ्देम्बेलाई अघि बढाउने निर्णय गरेको छ ।
केन्द्रीय कार्यसम्पादन समितिको बैठकले उनलाई सर्वसम्मत रूपमा नेता चयन गर्ने सहमति गरेको हो । अब उक्त निर्णयलाई औपचारिकता दिन संसदीय दलको बैठकबाट अनुमोदन गरिने तयारी गरिएको छ ।
२०६४ सालको पहिलो संविधानसभा निर्वाचनपछि कांग्रेसले पहिलो पटक सर्वसम्मत रूपमा दलको नेता चयन गर्न लागेको बताइएको छ । आङ्देम्बे समानुपातिक प्रणालीबाट निर्वाचित सांसद हुन् ।
प्रारम्भिक चरणमा दलको नेताका लागि अर्जुननरसिंह केसी र मोहन आचार्य समेत प्रतिस्पर्धामा देखिए पनि पार्टीभित्र एकता कायम गर्ने उद्देश्यले आङ्देम्बेको नाममा सहमति जुटाइएको हो ।
पार्टीको १४औं महाधिवेशनमा देउवा पक्षबाट सहमहामन्त्री बनेका आङ्देम्बे पछिल्लो विशेष महाधिवेशनमा भने सहभागी भएका थिएनन्, जहाँ गगन थापा सभापति चयन भएका थिए ।
