जनकपुर, २२ चैत। पत्रकार किरण कर्णले सत्तामा पुगेपछि नेताहरूको व्यवहार परिवर्तन हुँदै पत्रकार र मिडियामाथि दबाब बढ्ने गरेको आरोप लगाएका छन्।
सामाजिक सञ्जालमार्फत उनले सडकमा हुँदा मिडिया र पत्रकारको समर्थन खोज्ने नेताहरू सत्तामा पुगेपछि जनताभन्दा पनि धन र नातामुखी बन्ने प्रवृत्ति देखिएको टिप्पणी गरेका छन् ।
उनले यस्तो प्रवृत्तिले सुशासन र पारदर्शिताविरुद्ध आवाज उठाउने पत्रकारहरू नै पहिलो निशानामा पर्ने अवस्था सिर्जना भएको बताएका छन्।
संघीय तथा प्रदेश सरकारको कार्यशैलीबाट पनि मिडिया र पत्रकारप्रति कस्तो व्यवहार भइरहेको छ भन्ने स्पष्ट देखिने उनको भनाइ छ।
कर्णले नेताहरूलाई आत्मसमीक्षा गर्न आग्रह गर्दै अरूको आलोचना गर्नु अघि आफ्नै कमजोरी सुधार्नुपर्नेमा जोड दिएका छन्।
साथै, उनले वर्तमान अवस्थाबाट सचेत भई सुधारतर्फ अग्रसर हुन सम्बन्धित पक्षलाई आग्रह गरेका छन्।
