जनकपुर, ५ चैत । मधेश प्रदेशका गृह, सञ्चार तथा कानुन मन्त्री फकिरा महतोले पर्सा जिल्लामा अवस्थित सशस्त्र प्रहरी बल, नेपाल अन्तर्गत जिल्ला शस्त्र प्रहरी बल गण नं. १३ को अनुगमन तथा निरीक्षण गरेका छन् ।
अनुगमनका क्रममा मन्त्री महतोले गणको सुरक्षा व्यवस्था, जनशक्ति व्यवस्थापन, भौतिक पूर्वाधार तथा दैनिक कार्यसम्पादनबारे जानकारी लिएका थिए ।
उनले सीमा सुरक्षादेखि आन्तरिक शान्ति कायम गर्न सशस्त्र प्रहरीले खेलेको भूमिकाको प्रशंसा गर्दै अझ प्रभावकारी ढंगले काम गर्न निर्देशन दिएका छन् ।
निरीक्षणका क्रममा मन्त्री महतोले सुरक्षा निकायलाई आधुनिक प्रविधिको प्रयोग बढाउन, जनतासँग समन्वय सुदृढ गर्न तथा अपराध नियन्त्रणमा सक्रिय रहन सुझाव दिएका थिए ।
साथै, उनले सुरक्षाकर्मीहरूको मनोबल उच्च राख्न आवश्यक स्रोत–साधनको व्यवस्थापनमा प्रदेश सरकार प्रतिबद्ध रहेको पनि उल्लेख गरे ।
कार्यक्रममा शस्त्र प्रहरीका उच्च अधिकृतहरू, स्थानीय प्रशासनका प्रतिनिधिहरू तथा अन्य सरोकारवाला निकायहरूको समेत उपस्थिति रहेको थियो ।
