जनकपुर, २१ फागुन । देशभर प्रतिनिधिसभा निर्वाचनको मतदान सम्पन्न भएसँगै विभिन्न निर्वाचन क्षेत्रमा मतपेटिका संकलन गर्ने कार्य तीव्र रूपमा अघि बढाइएको छ ।
धेरैको चासो रहेको धनुषा निर्वाचन क्षेत्र नं. ३ मा पनि मतपेटिका संकलन गरी मतगणना स्थलमा ल्याउने काम जारी रहेको छ । धनुषा–३ मा मतदान सम्पन्न भएसँगै सबैको ध्यान अब मतगणनातर्फ केन्द्रित भएको छ ।
सुरक्षा निकायको कडा निगरानीमा मतपेटिका ढुवानी गरी मतगणना स्थलमा राखेको छ । निर्वाचन अधिकृतका अनुसार सबै मतपेटिका संकलन केन्द्रमा आइपुगेपछि मुख्य निर्वाचन अधिकृतले राजनीतिक दलका प्रतिनिधि, उम्मेदवार तथा स्वतन्त्र उम्मेदवारहरूलाई बोलाएर सर्वदलीय बैठक आयोजना गर्नेछन् ।
उक्त बैठकमा मतगणनासम्बन्धी प्रक्रिया, गणना गर्ने स्थान, प्रतिनिधिको व्यवस्था लगायतका विषयमा सहमति जुटाइनेछ ।
