काठमाडौं, २१ फागुन । प्रतिनिधिसभा निर्वाचनअन्तर्गत आज देशभर मतदान समग्रमा शान्तिपूर्ण रूपमा सम्पन्न भएको छ ।
निर्वाचन आयोगका अनुसार बिहान ७ बजेदेखि बेलुकी ५ बजेसम्म देशभरका अधिकांश मतदान केन्द्रमा मतदान प्रक्रिया सञ्चालन भई सम्पन्न भएको हो ।
आयोगका अनुसार दोलखाको तामाकोशी गाउँपालिका–४ स्थित मालु मतदान केन्द्र बाहेक अन्य सबै मतदान केन्द्रमा मतदान सकिएको छ ।
उक्त केन्द्रमा भने केही प्राविधिक तथा व्यवस्थापकीय कारणले मतदान प्रभावित भएको जनाइएको छ । निर्वाचन आयोगले समग्रमा देशभर मतदान शान्तिपूर्ण ढंगले सम्पन्न भएको जनाएको छ ।
सुरक्षाकर्मी तथा निर्वाचन कर्मचारीको व्यवस्थापनका कारण अधिकांश स्थानमा मतदाताले सहज रूपमा मतदान गर्न पाएका थिए । यद्यपि केही स्थानमा भने असन्तुष्टि जनाउँदै मतदान बहिष्कारका घटना पनि भएका छन् ।
.ओखलढुंगाको मानेभञ्ज्याङ क्षेत्रमा स्थानीय बासिन्दाले विभिन्न माग राख्दै मतदान बहिष्कार गरेका हुन् । त्यस्तै दाङको बबई गाउँपालिका–७ स्थित देउती माध्यमिक विद्यालय (तल्लो मलई) र बबई–१ मा रहेको जनता माध्यमिक विद्यालय मतदान केन्द्रमा पनि मतदाताले मतदान बहिष्कार गरेको जनाइएको छ ।
छिटपुट घटना बाहेक देशभर मतदान शान्तिपूर्ण रूपमा सम्पन्न भएको निर्वाचन आयोगले जनाएको छ ।
