जनकपुर, १८ फागुन । मधेस प्रदेशमा आसन्न प्रतिनिधिसभा सदस्य निर्वाचनका लागि सम्पूर्ण तयारी पूरा भएको छ ।
निष्पक्ष, शान्तिपूर्ण र भयरहित निर्वाचन सुनिश्चित गर्न सुरक्षा व्यवस्था कडा पारिएको मधेस प्रदेश प्रहरी कार्यालयले जनाएको छ । प्रदेश प्रहरी कार्यालय जनकपुरका अनुसार आचारसंहिता उल्लङ्घन तथा निर्वाचन भाँड्ने गतिविधि रोक्न योजनाबद्ध सुरक्षा परिचालन गरिएको छ ।
नेपाल–भारत सीमाक्षेत्रसहित संवेदनशील स्थानमा चेकप्वाइन्ट राखी विशेष निगरानी भइरहेको छ । निर्वाचनका लागि नेपाली सेना, सशस्त्र प्रहरी, नेपाल प्रहरी र निर्वाचन सुरक्षाकर्मीसहित ५० हजारभन्दा बढी सुरक्षाकर्मी परिचालन गरिएको छ ।
प्रदेशका २,१६० मतदान स्थलमध्ये १,२४६ अतिसंवेदनशील, ७५५ संवेदनशील र १५९ सामान्य श्रेणीमा राखिएका छन् । सिरहा, सर्लाही, रौतहट र पर्सालाई बढी सुरक्षा चुनौती भएका जिल्ला मानिएको छ ।
प्रदेशमा कूल ४,४७१ मतदान केन्द्र, ३५ लाखभन्दा बढी मतदाता र १,०२८ उम्मेदवार रहेका छन् ।
