काठमाडौँ, १८ फागुन । आगामी फागुन २१ गते हुने प्रतिनिधिसभा सदस्य निर्वाचनका लागि राजनीतिक दल र उम्मेदवारले गर्ने प्रचारप्रसार आज राति १२ बजेदेखि निषेध हुने भएको छ ।
निर्वाचन आयोग का अनुसार मतदानको ४८ घण्टा अघिदेखि मतदान सम्पन्न भई मतदान केन्द्र बन्द नहुन्जेलसम्म ‘प्रचारप्रसार निषेध अवधि’ लागू हुन्छ ।
आयोगका सहायक प्रवक्ता कुलबहादुर जिसीका अनुसार यस अवधिमा कुनै पनि प्रकारको प्रचारप्रसार, राजनीतिक विज्ञापन, सामाजिक सञ्जालमा पोष्ट वा शेयर, सन्देश सम्प्रेषण तथा मत माग्ने कार्य गर्न पाइँदैन । साथै आज राति १२ बजेभित्र मतदानस्थलको ३०० मिटर वरपर राखिएका सबै प्रचार सामग्री हटाउनुपर्ने व्यवस्था गरिएको छ ।
निर्वाचन आचारसंहिता, २०८२ अनुसार मौन अवधिले मतदातालाई स्वतन्त्र र विवेकपूर्ण निर्णय गर्ने अवसर प्रदान गर्दै स्वच्छ र निष्पक्ष निर्वाचनमा सहयोग पुग्ने आयोगको विश्वास छ । आयोगले निर्वाचनको सम्पूर्ण तयारी अन्तिम चरणमा पुगेको पनि जनाएको छ ।
