काठमाडौँ, १८ फागुन । प्रधानमन्त्री सुशीला कार्कीले आउँदो फागुन २१ गते हुने आम निर्वाचनमा उत्साहपूर्वक सहभागी हुन सम्पूर्ण मतदातालाई अपिल गरेकी छन् ।
देशवासीका नाममा गरिएको विशेष सम्बोधनमा उनले मतदानलाई आफ्नो र सन्ततिको भविष्य निर्धारण गर्ने महत्वपूर्ण निर्णयको रूपमा लिन आग्रह गरिन् ।
प्रधानमन्त्री कार्कीले ‘जेन–जी आन्दोलन’ पछिको जटिल परिस्थितिमा सरकारको नेतृत्व सम्हाल्दै देशलाई हिंसात्मक मोडबाट जोगाई शान्ति र संविधानको बाटोमा फर्काउन सफल भएको दाबी गरिन् ।
निर्वाचनको मुखमा फैलाइने भ्रामक सूचनामाथि सरकारको कडा निगरानी रहेको उल्लेख गर्दै उनले दण्डहीनताविरुद्ध कडाइका साथ कानुनी कारबाही हुने चेतावनी दिइन् ।
साथै, सरकार र निर्वाचन आयोग स्वच्छ, निष्पक्ष र भयरहित निर्वाचनका लागि पूर्ण रूपमा तयार रहेको बताउँदै मौन अवधिमा अनुशासन पालना गर्न सबै दललाई आग्रह गरिन् ।
