जनकपुर, १८ फागुन । धनुषा निर्वाचन क्षेत्र नं. ४ का नेपाली कांग्रेसका प्रतिनिधिसभा सदस्य उम्मेदवार महेन्द्र यादव चुनावी अभियानअन्तर्गत मतदाता भेटघाटमा व्यस्त देखिएका छन् ।
निर्वाचन नजिकिँदै जाँदा उनी गाउँ–गाउँ पुगेर जनताको समस्या सुन्ने र आफ्ना प्रतिबद्धता सार्वजनिक गर्ने कार्यमा सक्रिय छन् । आज बिहान क्षेत्रीय सभापति कुमारकान्त झाको नेतृत्वमा लक्ष्मीनिया गाउँपालिका–७ कुमरोडाबाट र्याली निकालिएको थियो ।
र्यालीमा स्थानीय नेता–कार्यकर्ता, समर्थक तथा सर्वसाधारणको उल्लेख्य सहभागिता रहेको थियो । सहभागीहरूले पार्टीको झण्डा, ब्यानर र नारासहित चुनावी माहोल सिर्जना गरेका थिए ।
र्यालीपछि उम्मेदवार यादवले स्थानीय बासिन्दासँग प्रत्यक्ष संवाद गर्दै शिक्षा, स्वास्थ्य, सडक, खानेपानी र रोजगारीजस्ता विषयलाई प्राथमिकतामा राखेर काम गर्ने प्रतिबद्धता व्यक्त गरेका छन् ।
उनले विकास र सुशासनका लागि जनताको साथ र विश्वास आवश्यक रहेको बताउँदै मतदानमार्फत समर्थन गर्न आग्रह गरेका छन् ।
