काठमाडौँ, १५ फागुन । नेकपा एमालेका अध्यक्ष केपी शर्मा ओलीले सरकारले अझै पनि निर्वाचनका लागि निष्पक्ष र विश्वसनीय वातावरण बनाउन नसकेको टिप्पणी गरेका छन् ।
उनले वर्तमान सरकारले चुनावलाई निष्पक्ष, पारदर्शी र धाँधलीरहित बनाउन गम्भीरता नदेखाएको आरोप लगाए । शुक्रबार दमकमा अनेरास्ववियूले आयोजना गरेको ‘बासँग विद्यार्थी’ कार्यक्रममा सम्बोधन गर्दै अध्यक्ष ओलीले देशको सार्वभौम संसद् ध्वंस गरिएको र त्यसकै कारण मुलुक संकटतर्फ धकेलिएको दाबी गरे।
उनले उक्त संकटबाट देशलाई मुक्त गर्न नेकपा एमाले निर्वाचनमा होमिएको बताए । अध्यक्ष ओलीले कुनै पनि प्रकारको धाँधली, दबाब र अनियमितता एमालेका लागि स्वीकार्य नहुने स्पष्ट पारे।
‘चुनाव स्वच्छ र निष्पक्ष हुनुपर्छ, त्यसमा कुनै सम्झौता हुँदैन,’ उनले भने । उनले एमाले देशैभर संगठित रूपमा चुनावी अभियानमा केन्द्रित रहेको उल्लेख गर्दै आगामी निर्वाचनबाट एमाले नै पहिलो शक्ति बन्ने दाबी गरे ।
