जनकपुर, १४ फागुन । धनुषा निर्वाचन क्षेत्र नं. ४ बाट जनता समाजवादी पार्टी नेपालका प्रतिनिधिसभा सदस्य उम्मेदवार डा. कृष्ण चन्द्र प्रसाद साह हाल चुनावी प्रचार–प्रसारलाई तीव्र बनाउँदै मतदाता भेटघाट तथा घरदैलो कार्यक्रममा सक्रिय देखिनु भएको छ ।
गाउँ–टोलमा पुगेर मतदातासँग प्रत्यक्ष संवाद गर्दै आफ्नो चुनावी एजेन्डा प्रस्तुत गरिरहेका साहलाई स्थानीय मतदाताको उल्लेख्य समर्थन मिलिरहेको बताइन्छ ।
यसैबीच उम्मेदवार साहको सामाजिक सञ्जालसँग सम्बन्धित गम्भीर समस्या सार्वजनिक भएको छ । उनको ह्वाट्सएप, फेसबुक लगायतका सामाजिक सञ्जाल तथा बैंक खातासमेत ह्याक भएको जानकारी प्राप्त भएको छ ।
विशेषगरी ह्वाट्सएप एकाउन्ट प्रयोग गरी विभिन्न व्यक्तिहरूसँग पैसा मागिएको सन्देश पठाइएको पाइएको छ, जसले मतदाता र सर्वसाधारणमा अन्योल सिर्जना गरेको छ ।
उम्मेदवार साहले यस घटनाप्रति गम्भीर ध्यानाकर्षण जनाउँदै आफू निर्वाचनमा जितको बलियो सम्भावना देखिएपछि विपक्षी पक्षबाट बदनाम गर्ने उद्देश्यले यस्तो नियोजित षड्यन्त्र गरिएको आरोप लगाएका छन् ।
उनले यस्ता भ्रामक र आपराधिक गतिविधिबाट सचेत रहन मतदाता तथा सर्वसाधारणलाई आग्रह गर्दै, आफ्नो नाममा आएका पैसासम्बन्धी कुनै पनि सन्देशप्रति विश्वास नगर्न अनुरोध गरेका छन् ।
साथै, उनले साइबर अपराधसम्बन्धी निकायमा आवश्यक उजुरी दिने तयारी भइरहेको जानकारी दिँदै, दोषीमाथि कानुनी कारबाही गरिने बताए ।
चुनावी प्रतिस्पर्धा तीव्र बन्दै गएको यस अवस्थामा यस्तो गतिविधिले लोकतान्त्रिक प्रक्रियामाथि नकारात्मक असर पार्ने भन्दै उनले निष्पक्ष र मर्यादित चुनावी वातावरणको मागसमेत गरेका छन् ।
