काठमाडौँ, १४ फागुन । राजेन्द्र लिङदेनले सामाजिक सञ्जालको प्रभावमा नपरी यथार्थको आधारमा मतदान गर्न मतदातालाई आग्रह गरेका छन् ।
बिहीवार काठमाडौँ निर्वाचन क्षेत्र नम्बर २ को चुनावी अभियानलाई सम्बोधन गर्दै राष्ट्रिय प्रजातन्त्र पार्टीका अध्यक्ष लिङदेनले फेसबुक, टिकटक र रिल्सजस्ता सामग्रीको प्रभावबाट टाढा रहन विशेषगरी युवापुस्तालाई आह्वान गरे ।
उनले यो निर्वाचन केवल सांसद छान्ने प्रक्रिया मात्र नभई देशको भविष्यसँग जोडिएको निर्णायक मोड भएको उल्लेख गरे । देशको अस्तित्व नै संकटमा परेको दाबी गर्दै ‘नेपाल प्रथम’ सोचका साथ सोचविचार गरेर मतदान गर्नुपर्नेमा जोड दिए।
विगतमा असफल नेतृत्वलाई पुनः मत दिएर गल्ती दोहोर्याउने कि नगर्ने भन्ने निर्णय मतदाताकै हातमा रहेको उनले बताए ।
साथै, वैदेशिक हस्तक्षेप रोक्न आगामी संसदमा राप्रपालाई बलियो शक्ति बनाउनु आवश्यक रहेको उल्लेख गर्दै काठमाडौँ–२ सहित देशभर राप्रपाका उम्मेदवारलाई विजयी गराउन आग्रह गरे ।
