जनकपुर, १३ फागुन। प्रतिनिधिसभा सदस्य निर्वाचनको मिति नजिकिँदै जाँदा धनुषा निर्वाचन क्षेत्र नम्बर ३ मा राजनीतिक गतिविधि र सरगर्मी उल्लेखनीय रूपमा बढ्दै गएको छ ।
प्रमुख राजनीतिक दलका उम्मेदवारहरू मतदातासँग प्रत्यक्ष सम्पर्कमा जुटिरहेका छन् भने समर्थन र सहकार्यका गतिविधिहरू पनि तीव्र बन्दै गएका छन् ।
यसै क्रममा धनुषा निर्वाचन क्षेत्र नम्बर ३ का प्रतिनिधिसभा सदस्य पदका उम्मेदवार निधिलाई भेट्न विभिन्न देश तथा क्षेत्रबाट आएका प्रतिनिधिहरू जनकपुरधाम पुगेका छन् ।
भेटघाट गर्नेमा डेनमार्कका जनसम्पर्क समितिका प्रतिनिधि नवीन आचार्य, दक्षिण कोरियाका जनसम्पर्क समितिका प्रतिनिधि नवराज सिवाकोटी, दुबईका जनसम्पर्क समितिका प्रतिनिधि खेमराज बस्नेत तथा काठमाडौँ क्षेत्रका जनसम्पर्क समितिका प्रतिनिधि राजन दाहाल रहेका छन् ।
उक्त भेटमा आगामी निर्वाचन, स्थानीय विकासका मुद्दा, प्रवासी नेपालीहरूको भूमिका तथा राजनीतिक अवस्थाबारे छलफल भएको बताइएको छ ।
प्रतिनिधिहरूले उम्मेदवार निधिप्रति समर्थन जनाउँदै लोकतान्त्रिक प्रक्रिया सफल बनाउन सबैको सहकार्य आवश्यक रहेको धारणा व्यक्त गरेका छन् ।
निर्वाचन नजिकिँदै जाँदा यस प्रकारका भेटघाट र राजनीतिक सक्रियताले धनुषा निर्वाचन क्षेत्र नम्बर ३ को चुनावी माहोल थप तातेको देखिएको छ ।
