पर्सा, ११ फागुन । आइतबार साँझ युवा समूहबीच झडप भएपछि उत्पन्न सुरक्षा अवस्थालाई मध्यनजर गर्दै जिल्ला प्रशासन कार्यालय पर्साले वीरगञ्ज महानगरपालिका क्षेत्रमा आज बिहान ९:४५ बजेदेखि अर्को आदेश नभएसम्मका लागि अनिश्चितकालीन कफ्र्यु लगाएको छ ।
प्रमुख जिल्ला अधिकारी भोला दाहालका अनुसार कफ्र्यु पूर्वमा बाइपास रोड, पश्चिममा सिर्सिया नदी, उत्तरमा गण्डक चोक र दक्षिणमा शंकराचार्य गेटसम्म लागू गरिएको छ ।
कफ्र्यु अवधिभर आवत–जावत, भेला, जुलुस, प्रदर्शन लगायतका गतिविधिमा पूर्ण प्रतिबन्ध लगाइएको छ । यद्यपि अत्यावश्यक सेवाका सवारीसाधन, सञ्चारकर्मी, परीक्षा दिने परीक्षार्थी, पर्यटक सवार गाडी तथा कूटनीतिक र मानवअधिकार नियोगका सवारीसाधनलाई भने सञ्चालन अनुमति दिइएको जिल्ला प्रशासन कार्यालय पर्सा जिल्लाले जनाएको छ ।
