जनकपुर, ४ फाल्गुन । धनुषा निर्वाचन क्षेत्र नम्बर–३ का प्रतिनिधिसभा सदस्यका उम्मेदवार प्रमेश्वर साहले आफू कुनै दिग्गज नेता नभई समाजसेवाबाट राजनीतिमा आएको व्यक्ति भएको बताएका छन् ।
केपी खवरको अन्तरवार्ताका क्रममा उनले जनतासँग कहिल्यै झुठ नबोलेकै कारण आफूलाई जनताले माया र विश्वास दिएको दाबी गरे । साहले यस क्षेत्रका अघिल्ला मन्त्री तथा जनप्रतिनिधिहरूले अपेक्षित विकास र सेवा दिन नसकेको आरोप लगाउँदै त्यसकै विकल्पका रूपमा आफ्नो उम्मेदवारी अघि सारेको बताए ।
“पहिलाका मन्त्रीहरूले क्षेत्रका लागि खासै काम गर्न सकेनन्, त्यसैले मैले जनताको आवाज बनेर उम्मेदवारी दिएको हुँ,” उनले भने । उनले हाल देखिएको राजनीतिक ‘परिवर्तनको लहर’ वास्तविक नभई भ्रम मात्रै भएको टिप्पणी गर्दै संघीयता कमजोर पार्ने प्रयास भइरहेको दाबी गरे ।
विशेषगरी राष्ट्रिय स्वतन्त्र पार्टी संघीयताको विरोधी धारणा बोकेको आरोप उनको छ । “संघीयता हामीले सजिलै पाएका होइनौं, लामो संघर्ष र बलिदानपछि प्राप्त भएको व्यवस्था हो,” साहले भने, “यसलाई कमजोर बनाउने वा उल्ट्याउने कुनै पनि प्रयास स्वीकार्य हुँदैन ।
उनले संघीयता सुदृढ बनाएर मात्रै मधेस र धनुषाजस्ता क्षेत्रको समग्र विकास सम्भव हुने भन्दै जनतासँगै रहेर काम गर्ने प्रतिबद्धता व्यक्त गरे ।
