काठमाडौं, ४ फाल्गुन । प्रतिनिधिसभा सदस्य निर्वाचनका लागि आजदेखि औपचारिक रूपमा प्रचार–प्रसार सुरु भएको छ ।
मतदान मितिभन्दा १५ दिनअघि सुरु हुने यो अवधि फागुन १८ गते राति १२ बजेसम्म रहनेछ । यस अवधिमा राजनीतिक दल तथा उम्मेदवारले जुलुस, आमसभा, कोणसभा गर्न र सञ्चारमाध्यममार्फत प्रचार सामग्री प्रकाशन–प्रसारण गर्न पाउनेछन् ।
निर्वाचन आयोगले आचारसंहिता पूर्ण पालना गर्न आग्रह गर्दै उल्लङ्घनमा शून्य सहनशीलता नीति अपनाइने जनाएको छ ।
कार्यवाहक प्रमुख निर्वाचन आयुक्त रामप्रसाद भण्डारीका अनुसार आचारसंहिता उल्लङ्घनमा चेतावनीदेखि जरिवाना र उम्मेदवारी खारेजीसम्मको व्यवस्था छ ।
आयोगले मिथ्या सूचना, दुष्प्रचार र द्वेषपूर्ण अभिव्यक्ति फैलाउन नपाइने स्पष्ट गरेको छ ।
