महोत्तरी, २ फाल्गुन । महोत्तरी निर्वाचन क्षेत्र नं. ३ बाट प्रतिनिधिसभा स्वतन्त्र उम्मेदवार हरिनारायण यादवले पिपरा गाउँपालिकामा जनता संवाद कार्यक्रम सम्पन्न गरेका छन् ।
आगामी प्रतिनिधिसभा निर्वाचनलाई लक्षित गर्दै आयोजना गरिएको कार्यक्रममा हजारौँ मतदाताको उल्लेखनीय उपस्थिति रहेको थियो । यसअघि जनता समाजवादी पार्टी (जसपा) नेपालबाट टिकट नपाएपछि यादवले स्वतन्त्र उम्मेदवारी दिएका हुन् ।
जनता संवाद कार्यक्रममा भने जसपा नेपालकै जनप्रतिनिधि तथा नेताहरूको समेत उल्लेखनीय सहभागिता देखिएको थियो, जसले कार्यक्रमलाई थप चासोपूर्ण बनाएको छ ।
कार्यक्रममा जलेश्वर नगरपालिकाका नगर प्रमुख सुरेश साह, पिपरा गाउपालिकाका अध्यक्ष रामजानककी यादब, उपाध्यक्ष बन्दना पाण्डे तथा जसपा नेपालका युवा नेता राहुल पाण्डे लगायतको उपस्थिति रहेको थियो ।
जनता संवादका क्रममा उम्मेदवार यादवले स्थानीय विकास, रोजगारी, शिक्षा, स्वास्थ्य तथा किसानका समस्याबारे आफ्ना धारणा राख्दै जनताको प्रत्यक्ष सुझाव संकलन गरेका थिए ।
उनले दलगत सीमाभन्दा माथि उठेर क्षेत्रको समग्र विकासका लागि आफूले उम्मेदवारी दिएको स्पष्ट पारे ।
कार्यक्रममा सहभागी मतदाताहरूले विकास, सुशासन र जनप्रतिनिधिको जवाफदेहिताबारे प्रश्न उठाउँदै आगामी निर्वाचनमा सचेत निर्णय गर्ने प्रतिबद्धता व्यक्त गरेका थिए ।
