जनकपुर, २ फाल्गुन । नेपाली कांग्रेस धनुषा क्षेत्र नं. ०४ (क) का युवा परिचालन समितिको आयोजनामा मिथिला बिहारी नगरपालिकामा युवा परिचालन भेला सम्पन्न भएको छ ।
भेलामा वडा नं. २, ६, ७, ८, ९ र १० का युवाहरूको उल्लेखनीय उपस्थिति रहेको थियो । युवा परिचालन समितिका संयोजक मो. अताउल हकको अध्यक्षतामा सम्पन्न कार्यक्रममा नेपाली कांग्रेस धनुषा क्षेत्र नं. ०४ का प्रतिनिधिसभा सदस्य पदका उम्मेदवार महेन्द्र यादव, समानुपातिकतर्फका उम्मेदवार डा. चन्द्र मोहन यादव, क्षेत्रीय सभापति कुमार कान्त झा तथा मधेश प्रदेश सरकारका पूर्व मन्त्री शेष नारायण यादवको विशेष उपस्थिति रहेको थियो ।
कार्यक्रममा वक्ताहरूले युवालाई संगठन सुदृढीकरणमा सक्रिय भूमिका निर्वाह गर्न आग्रह गर्दै आगामी निर्वाचन तथा पार्टीका गतिविधिमा अग्रसर हुन आह्वान गरे ।
उनीहरूले युवाशक्तिको सहभागिताबिनाको राजनीतिक परिवर्तन सम्भव नहुने उल्लेख गर्दै कांग्रेसलाई बलियो बनाउन एकताबद्ध भएर लाग्नुपर्नेमा जोड दिए ।
