जनकपुर, २ फाल्गुन । मैथिली विकास कोषको आयोजनामा तथा मधेश प्रदेश सरकारको शिक्षा तथा संस्कृति मन्त्रालय, जनकपुर उपमहानगरपालिका र राजर्षिजनक विश्वविद्यालयको सह–आयोजनामा चारदिने अन्तर्राष्ट्रिय मैथिली नाट्य महोत्सव हुने भएको छ ।
पत्रकार सम्मेलनमार्फत महोत्सवको तयारी अन्तिम चरणमा पुगेको जानकारी आयोजित दिइएको छ । मैथिली विकास कोषका अध्यक्ष जीवनाथ चौधरीका अनुसार महोत्सव फागुन ५ गतेदेखि ८ गतेसम्म सञ्चालन हुनेछ ।
महोत्सवमा नेपाल र भारतका मैथिली भाषा, साहित्य, संस्कृति, सामाजिक तथा आर्थिक क्षेत्रमा योगदान दिएका विद्वान, विदुषी तथा कलाकारहरूको सहभागिता रहनेछ ।
यसअघि चार पटक सफलतापूर्वक आयोजना भइसकेको महोत्सवमा यसपालि २० विषयमा विमर्श हुने जनाइएको छ । साहित्यसँगै राजनीति, समाज र इतिहाससम्बन्धी विषयहरूमा समेत छलफल हुनेछ ।
महोत्सवका क्रममा चित्रकला र पुस्तक प्रदर्शनी, मिथिलाका परिकार, सांस्कृतिक कार्यक्रम, शोभा यात्रा, विद्यालयस्तरीय वक्तृत्वकला, कविता वाचन, लोकनृत्य प्रतियोगिता, मिथिला चित्रकलाको कार्यशाला तथा प्रदर्शनी, पाँचवटा नाटक र कवि गोष्ठी आयोजना गरिनेछ ।
करिब ५२ लाख रुपैयाँ लागत अनुमान गरिएको महोत्सव जनकपुर–८ स्थित मैथिली विकास कोषको भवन तथा परिसरमा हुनेछ ।
