काठमाडौँ, २ फाल्गुन । प्रतिनिधिसभा सदस्य निर्वाचनका लागि मतपत्र छपाइ अन्तिम चरणमा पुगेको छ ।
निर्वाचन आयोगका अनुसार ६३ जिल्लाका १ सय ३३ निर्वाचन क्षेत्रका मतपत्र छपाइ सम्पन्न भइसकेको छ भने अब काठमाडौँ उपत्यका आसपासका १४ जिल्लाको मात्र बाँकी छ ।
भक्तपुरस्थित जनक शिक्षा सामग्री केन्द्रमा नियमित रूपमा मतपत्र छपाइ भइरहेको छ । हालसम्म १ करोड ७१ लाख ६३ हजार मतपत्र छपाइ भइसकेको छ ।
छापिएका मतपत्रमध्ये १५ हजार ३७१ बाकस प्याकिङ भइसकेको र दैनिक करिब ११–१५ लाख मतपत्र छपाइ तथा करिब १ हजार बाकस प्याकिङ भइरहेको आयोगले जनाएको छ ।
मतपत्र छपाइ तीन दिनभित्र सकिने अनुमान गरिएको छ । कर्णाली प्रदेशका १० जिल्लाका १२ निर्वाचन क्षेत्रमा मतपत्र ढुवानी आजैदेखि सुरु गरिएको आयोगले जानकारी दिएको छ । आगामी फागुन २१ गते निर्वाचन हुँदैछ ।
