काठमाडौँ, १ फाल्गुन । राष्ट्रपति रामचन्द्र पौडेलले आसन्न निर्वाचनलाई स्वच्छ, निष्पक्ष र भयरहित वातावरणमा सम्पन्न गर्न शान्ति–सुरक्षाको व्यवस्था सशक्त र प्रभावकारी बनाउन निर्देशन दिएका छन् ।
आवश्यक स्रोत, साधन र जनशक्ति प्रबन्धमा सरकारले विशेष ध्यान दिने विश्वास पनि उहाँले व्यक्त गर्नुभयो । शुक्रबार साँझ शीतल निवासमा गृहमन्त्रीसहित चारै सुरक्षा निकायका प्रमुखहरूसँगको भेटघाटमा राष्ट्रपति पौडेलले निर्वाचन लोकतन्त्रको महत्वपूर्ण माध्यम भएकाले कुनै कसर नछोड्न आग्रह गर्नुभएको हो ।
भेटघाटमा गृहमन्त्री ओमप्रकाश अर्याल, नेपाली सेना, नेपाल प्रहरी, सशस्त्र प्रहरी बल नेपाल र राष्ट्रिय अनुसन्धान विभागका प्रमुखहरूको उपस्थिति थियो ।
