काठमाडौँ, १ फाल्गुन । ज्ञानेन्द्र शाह झापाबाट फर्किएर काठमाडौँ आइपुगेका छन् । उनको आगमनसँगै त्रिभुवन अन्तर्राष्ट्रिय विमानस्थलमा समर्थकहरूको उल्लेखनीय भीड देखिएको छ ।
समर्थकहरूले नाराबाजी गर्दै पूर्वराजाको स्वागत गरेका छन् । पूर्वराजा शाहलाई स्वागत गर्न राष्ट्र, राष्ट्रियता, धर्म, संस्कृति र नागरिक बचाउ महाअभियानका संयोजक दुर्गा प्रसाईं तथा राष्ट्रिय प्रजातन्त्र पार्टीका नेता कमल थापासहित राजावादी समर्थकहरू विमानस्थल पुगेका थिए ।
प्रशासनले विमानस्थल क्षेत्रमा निषेधाज्ञा जारी गरे पनि समर्थकहरूको भीड बढेपछि सुरक्षा व्यवस्था कडा बनाइएको छ । विमानस्थल परिसर तथा आसपासका क्षेत्रमा नेपाल प्रहरी, सशस्त्र प्रहरी र अन्य सुरक्षा निकायका सुरक्षाकर्मीहरू परिचालन गरिएको छ ।
प्रशासनले सार्वजनिक सुरक्षा र आवागमन सहज राख्न निगरानी बढाइएको जनाएको छ ।
