जनकपुर, २८ माघ । धनुषा जिल्लाको जनकपुरधाम उपमहानगरपालिका–१३ मणिमण्डपका नेकपा (एमाले) परित्याग गरेका २० जना नेता तथा कार्यकर्ता नेपाली कांग्रेसमा प्रवेश गरेका छन्।
स्थानीयस्तरमा आयोजित एक कार्यक्रममा उनीहरूले औपचारिक रूपमा कांग्रेस प्रवेश गरेका हुन् । पार्टी प्रवेश कार्यक्रममा धनुषा क्षेत्र नम्बर ४ का प्रतिनिधिसभा उम्मेदवार महेन्द्र यादवले नवप्रवेशीहरूलाई माला र गम्छा लगाएर पार्टीमा स्वागत गर्दै कांग्रेस लोकतान्त्रिक मूल्य, समावेशी राजनीति र जनताको पक्षमा उभिएको पार्टी भएको बताए ।
उनले पार्टीलाई स्थानीयस्तरमा थप सुदृढ बनाउन सबैलाई एकताबद्ध भएर अघि बढ्न आग्रह गरे । कांग्रेस प्रवेश गर्नेहरूमा प्रमोद राउत, राजेन्द्र राउतलगायत स्थानीय युवा तथा सामाजिक रूपमा सक्रिय व्यक्तिहरू रहेका छन् ।
उनीहरूले कांग्रेसको नीति, विचार र नेतृत्वबाट प्रभावित भएर पार्टी प्रवेश गरेको प्रतिक्रिया दिएका छन् । कार्यक्रममा नेपाली कांग्रेस धनुषाका जिल्ला सभापति योगेन्द्र पजियार, पूर्वमन्त्री शेषनारायण यादव, क्षेत्रीय सभापति कुमारकान्त झा लगायत कांग्रेसका जिल्ला तथा स्थानीय तहका नेता–कार्यकर्ताको उल्लेखनीय उपस्थिति रहेको थियो ।
