जनकपुर, २७ माघ। धनुषा जिल्लाको मिथिला नगरपालिका वडा नम्बर ९ बडहरीमा नेकपा (एमाले) परित्याग गरी १०७ जना नेपाली कांग्रेसमा प्रवेश गरेका छन्।
एमालेको प्रभावशाली क्षेत्रका रूपमा चिनिँदै आएको बडहरीमा एकैपटक यति ठूलो संख्यामा कार्यकर्ता कांग्रेसमा प्रवेश गरेपछि जिल्लाको राजनीतिक वातावरण ततिएको छ।
कांग्रेस प्रवेश कार्यक्रमका क्रममा धनुषा क्षेत्र नम्बर ४ का प्रतिनिधिसभा उम्मेदवार महेन्द्र यादवले नवप्रवेशीहरुलाई माला र गम्छा लगाएर पार्टीमा स्वागत गरेका थिए।
उनले कांग्रेस जनताको भावना र चाहनाअनुसार अघि बढिरहेको भन्दै आगामी दिनमा पार्टीलाई अझ मजबुत बनाउने विश्वास व्यक्त गरे।
कार्यक्रममा नेपाली कांग्रेस धनुषाका जिल्ला सभापति योगेन्द्र पजियार, पूर्व मन्त्री शेषनारायण यादव लगायत कांग्रेसका स्थानीय तथा जिल्ला तहका नेता–कार्यकर्ताको उल्लेखनीय उपस्थिति रहेको थियो।
वक्ताहरूले एमालेभित्रको आन्तरिक असन्तुष्टि र कांग्रेसप्रतिको जनविश्वास बढ्दै गएको कारण यस्तो प्रवेश सम्भव भएको बताएका छन्।
