काठमाडौँ, २७ माघ । सरकारले चालु आर्थिक वर्ष २०८२÷८३ को पहिलो अर्धवार्षिक समीक्षा प्रतिवेदन सार्वजनिक गर्दै कुल बजेट खर्च करिब १४.०४ प्रतिशत कम हुने संशोधित अनुमान गरेको छ ।
समीक्षाअनुसार पुँजीगत खर्च सबैभन्दा बढी घटाइएको छ । सुरुमा ४ खर्ब ७ अर्ब ८९ करोड रुपैयाँ अनुमान गरिएको पुँजीगत बजेट घटाएर २ खर्ब ४३ अर्ब ३० करोडमा झारिएको छ, जुन प्रारम्भिक अनुमानभन्दा ४०.३५ प्रतिशत कम हो ।
सरकार परिवर्तन, साना आयोजना रोक्का, ठेक्का रद्द, राजनीतिक घटनाक्रम र निर्वाचनको प्रभावका कारण पुँजीगत खर्च घटेको विज्ञहरूको निष्कर्ष छ ।
अर्थमन्त्री रामेश्वर खनालले खर्च अनुमान अझै यथार्थपरक बनाउन खोजिएको बताए । अर्थविद्हरूले सुस्त अर्थतन्त्रको बेला खर्च घटाउनु नकारात्मक भएको टिप्पणी गरेका छन्।
यद्यपि, सरकारले मितव्ययिता, बजेट अनुशासन र तयारी पूरा भएका आयोजनालाई प्राथमिकता दिने जस्ता केही सकारात्मक सुधारका कदम चालिएको जनाएको छ ।
