सिरहा, २६ माघ । सिरहा कारागारमा नाइके इन्द्रजित यादवको विषयलाई लिएर कैदीबन्दीले तोडफोड र आगजनी गरेका छन् ।
विवादपछि यादवसहित १३ जना कैदीलाई नियन्त्रणमा लिएर जिल्ला प्रहरी कार्यालयमा राखिएको छ । अनुगमनका क्रममा कारागारभित्र बन्दुक, दुई राउन्ड गोली, १ लाख २० हजार रुपैयाँ नगद, चुरोट, सुर्ती लगायतका प्रतिबन्धित सामग्री बरामद गरिएको छ ।
अपरेसनका क्रममा कैदीहरूलाई हात बाँधेर कारागारको भित्री गेटबाट बाहिर निकालिएको थियो । प्रमुख जिल्ला अधिकारीका अनुसार नियन्त्रणमा आएका कैदीहरू कर्तव्य ज्यान, डाका, अपहरण, लागुऔषधसम्बन्धी गम्भीर मुद्दामा संलग्न छन् ।
१५० जना क्षमताको कारागारमा हाल ४३६ जना कैदीबन्दी रहेकाले व्यवस्थापनमा समस्या देखिएको छ । सुरक्षा कडा पारिएको छ भने कारागारभित्र र बाहिर प्रहरी र सशस्त्र प्रहरीको उपस्थिति बलियो छ ।
