काठमाडौं, २५ माघ । संघीय लोकतान्त्रिक गणतन्त्र स्थापना भएपछि देशको कार्यकारी नेतृत्व सम्हालेका पूर्वप्रधानमन्त्रीहरूमध्ये फागुन २१ गते हुने प्रतिनिधि सभा निर्वाचनमा तीन जना कम्युनिस्ट पृष्ठभूमिका नेता फरक–फरक निर्वाचन क्षेत्रबाट प्रतिस्पर्धामा उत्रिएका छन् ।
नेकपा एमाले अध्यक्ष केपी शर्मा ओली झापा–५, नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ रुकुमपूर्व र सहसंयोजक माधवकुमार नेपाल रौतहट–१ बाट उम्मेदवार बनेका छन् ।
ओलीलाई एमालेले प्रधानमन्त्रीको उम्मेदवारसमेत घोषणा गरेको छ । यता, नेपाली कांग्रेसका पूर्वसभापति तथा पूर्वप्रधानमन्त्री शेरबहादुर देउवाले यसपटक निर्वाचन नलड्ने घोषणा गरेका छन् ।
त्यस्तै, पूर्वप्रधानमन्त्री झलनाथ खनाल उम्मेदवार बनेनन् भने डा. बाबुराम भट्टराईले उम्मेदवारी दर्ता गराए पनि पछि फिर्ता लिए ।
गणतन्त्र स्थापनापछि प्रधानमन्त्री बनेका केही नेता चुनावी प्रतिस्पर्धाबाट बाहिर रहँदा तीन पूर्वप्रधानमन्त्री भने प्रत्यक्ष जनमत परीक्षणमा उत्रिएका छन् ।
