काठमाडौँ, २३ माघ । गृह मन्त्री ओमप्रकाश अर्यालले निर्वाचनको सुरक्षा चुस्त राख्न सुरक्षा निकायका प्रमुखहरूलाई हाई अलर्टमा काम गर्न निर्देशन दिएका छन् ।
गृह मन्त्रालयमा शुक्रबार बसेको केन्द्रीय सुरक्षा समितिको बैठकले एकीकृत निर्वाचन सुरक्षा योजना–२०८२ अन्तर्गत जिम्मेवार निकायहरूको काम, जनशक्ति परिचालन, बन्दोबस्ती योजना र सामाजिक सञ्जाल नियन्त्रणको समीक्षा गरेको छ ।
बैठकले निर्वाचन विरोधी गतिविधि गर्ने, ड्रोन प्रयोग रोक्ने, सुरक्षाकर्मीको बीमा गर्ने र मतदानस्थलमा आवश्यक व्यवस्था मिलाउने निर्णय पनि गरेको छ ।
यसका साथै निर्वाचन आचारसंहिताको उल्लङ्घन हुने मिथ्याचार र घृणास्पद अभिव्यक्तिको निगरानी गर्ने निर्देशन दिइएको छ ।
