जनकपुर, २२ माघ । उज्यालो नेपाल पार्टीका अध्यक्ष कुलमान घिसिङले आफ्नो पार्टी अरू कसैलाई प्रधानमन्त्री बनाउन नभई आफैं देशको नेतृत्व गर्न राजनीतिमा आएको स्पष्ट पारेका छन् ।
चुनावी कार्यक्रमका लागि जनकपुर आएका अध्यक्ष घिसिङले बुधबार बिहान सञ्चारकर्मीहरूसँगको भेटघाटमा मुलुकको वर्तमान राजनीतिक अवस्थाप्रति असन्तुष्टि व्यक्त गर्दै उज्यालो नेपाल पार्टी परिवर्तनको स्पष्ट एजेन्डासहित मैदानमा उत्रिएको बताए ।
उनले भने, “हामी देशको नेतृत्व गर्न आएका हौँ । अरू कसैलाई प्रधानमन्त्री बनाउन होइन। हामी नै यो देशमा वास्तविक परिवर्तन गर्नेछौँ ।
अध्यक्ष घिसिङले उज्यालो नेपाल पार्टी धेरै निर्वाचन क्षेत्रमा प्रतिस्पर्धामा रहेको दाबी गर्दै जनतामा नयाँ राजनीतिक शक्तिप्रति भरोसा बढ्दै गएको उल्लेख गरे ।
विगतमा व्यक्ति वा पार्टी हेरेर मतदान गर्ने प्रवृत्ति रहेको स्मरण गराउँदै उनले अब देशको समृद्धि, सुशासन र परिवर्तनका लागि मत दिनुपर्ने आवश्यकता औँल्याए ।
जेन–जी आन्दोलनपछि उदाएको नयाँ राजनीतिक शक्तिका रूपमा उज्यालो नेपाल पार्टी रहेको उल्लेख गर्दै उनले नयाँलाई विश्वास गरेर काम गर्ने अवसर दिन नागरिकसँग आग्रह गरे ।
“नयाँ सोच र नयाँ नेतृत्वलाई अवसर दिए मात्र देशले सही दिशामा फड्को मार्न सक्छ,” उनको भनाइ थियो ।
