काठमाडौं, २१ माघ । प्रतिनिधिसभा सदस्य निर्वाचनको मुखमा जिल्ला प्रहरी कार्यालय बागलुङले ठूलो परिमाणमा अवैध हतियार बरामद गरेको छ ।
प्रहरीले पछिल्लो ४५ दिनमा ११५ थान अवैध भरुवा बन्दुक नियन्त्रणमा लिएको भए पनि बन्दुकधारी भने पक्राउ पर्न सकेका छैनन् । प्रहरीका अनुसार गोठ, जङ्गल, ओढार र खाली घरमा लुकाएर राखिएका अवस्थामा बन्दुक फेला परेका हुन् ।
निर्वाचन सुरक्षाका साथै वनजंगलमा हुने चोरी–शिकारी नियन्त्रणका लागि सञ्चालन गरिएको खोजी अभियानबाट अहिलेसम्मकै धेरै हतियार बरामद गरिएको प्रहरी उपरीक्षक तिलक भारतीले जानकारी दिए ।
सबैभन्दा धेरै ६२ थान भरुवा बन्दुक इलाका प्रहरी कार्यालय बुर्तिवाङ मातहतको टोलीले बरामद गरेको प्रहरीले जनाएको छ ।
इजाजत पत्र बिना भरुवा बन्दुक राखे वा प्रयोग गरे पाँच वर्षसम्म कैद र ५० हजार रुपैयाँसम्म जरिवानाको व्यवस्था रहे पनि यसपटक हतियार धनी भने फेला परेका छैनन् ।
