काठमाडौं, २१ माघ । अन्तरिम सरकारका प्रधानमन्त्री सुशीला कार्कीले तोकिएको समयमै निर्वाचन सम्पन्न हुनेमा सरकार पूर्ण रूपमा प्रतिबद्ध रहेको स्पष्ट पारेकी छिन् ।
उनले सरकारले जसरी पनि निर्वाचन गराउन सबै प्रयास गरिरहेको बताउँदै कुनै कारणवश पहिलो चरणमा समस्या आए दोस्रो चरणमार्फत भए पनि निर्वाचन सम्पन्न गरिने स्पष्ट पारिन् ।
प्रधानमन्त्री कार्कीले विशेष गरी हिमाली तथा दुर्गम जिल्लाहरूमा चिसो मौसमका कारण केही जटिलता आउन सक्ने उल्लेख गर्दै त्यस्ता स्थानमा आवश्यक परे सवारी साधन प्रयोग गरी मतदातालाई सहज रूपमा मतदान केन्द्रसम्म पु¥याइने व्यवस्था गरिने बताइन् ।
भौगोलिक कठिनाइले निर्वाचन प्रक्रिया प्रभावित हुन नदिने सरकारको स्पष्ट नीति रहेको उनको भनाइ थियो । उनले निर्वाचन कुनै पनि हालतमा हुने र नयाँ प्रतिनिधिहरू चयन भइसकेपछि वर्तमान अन्तरिम सरकारले लोकतान्त्रिक अभ्यासअनुसार नयाँ सरकारलाई सत्ता हस्तान्तरण गर्ने प्रतिबद्धता पनि व्यक्त गरिन् ।
यस पटकको निर्वाचनका लागि करिब ३२ अर्ब रुपैयाँ खर्च हुने प्रारम्भिक अनुमान रहेको जानकारी समेत प्रधानमन्त्री कार्कीले दिइन् ।
प्रधानमन्त्री कार्कीले शान्तिपूर्ण, निष्पक्ष र विश्वसनीय निर्वाचन गराउन सरकार गम्भीर र सतर्क रहेको उल्लेख गर्दै सुरक्षा संयन्त्रलाई उच्च सतर्कतामा राखिएको बताइन्।
उनले सबै राजनीतिक दल, सुरक्षा निकाय र आम नागरिकलाई निर्वाचन सफल बनाउन सहयोग गर्न आग्रह समेत गरिन् ।
