जनकपुर, २० माघ । देश अहिले चुनावमय बनेको छ । आगामी निर्वाचनलाई लक्षित गर्दै उम्मेदवारहरू मतदातासँग भेटघाट, घरदैलो र चुनावी प्रचार–प्रसारमा व्यस्त देखिन्छन् ।
तर, चुनावी माहोलबीच पनि धनुषाको निर्वाचन क्षेत्र नं. ४ भित्र पर्ने एक दलित बस्ती भने अझै राज्यको नजरबाट ओझेलमै परेको देखिन्छ ।
धनुषाको क्षिरेश्वरनाथ नगरपालिका वडा नं. ३ अन्तर्गत पर्ने इम्ली टोल र करमाही टोलमा बसोबास गर्ने मुसहर समुदाय दशकौँदेखि त्यहीँ बस्दै आए पनि अहिलेसम्म राज्यबाट आधारभूत सुविधा र अधिकार पाउन सकेका छैनन् ।
सो बस्तीका अधिकांश बासिन्दासँग न नागरिकता छ, न त बसोबास गरिरहेको जमिनको लालपुर्जा नै । मुसहर बस्तीका नागरिकहरूका अनुसार उनीहरूले आजसम्म सरकारको विकास र सेवा–सुविधाको प्रत्यक्ष अनुभूति गर्न पाएका छैनन् ।
बस्तीमा पक्की घर छैन, शौचालयको अभाव छ, विद्युत् सेवा नहुँदा अन्धकारमै जीवन बिताउनुपरेको छ । त्यस्तै, धेरै बालबालिका विद्यालय जानबाट वञ्चित छन्, जसले गर्दा पुस्तौँदेखि गरिबी र पछौटेपनको चक्र तोडिन सकेको छैन ।
स्थानीय बासिन्दाहरूले पटक–पटक राजनीतिक दल र जनप्रतिनिधिसँग समस्या राखे पनि चुनावको समयमा मात्रै आश्वासन पाउने र पछि बेवास्ता हुने गरेको गुनासो गरेका छन् ।
चुनाव नजिकिँदै गर्दा उम्मेदवारहरू बस्तीमा पुगेर मत माग्ने गरे पनि नागरिकता, लालपुर्जा, शिक्षा, आवास र आधारभूत पूर्वाधारको समस्या समाधान नहुँदा उनीहरू निराश छन् ।
धनुषा क्षेत्र नं. ४ बाट प्रतिनिधिसभाका लागि नेपाली कांग्रेसबाट महेन्द्र यादव, नेकपा एमालेबाट रघुवीर महासेठ, र राष्ट्रिय स्वतन्त्र पार्टीबाट राज किशोर महतो लगायत उम्मेदवार चुनावी प्रतिस्पर्धामा छन् ।
मुसहर बस्तीका बासिन्दाहरू भने यसपटक चुनावी प्रतिबद्धता कागजमै सीमित नहोस् र आफ्नो जीवनमा वास्तविक परिवर्तन आओस् भन्ने विश्वास राखेका छन । 
