काठमाडौँ १९ माघ । आसन्न प्रतिनिधिसभा सदस्य निर्वाचन सुरक्षाका लागि छनोट भएका करिब ३ हजार निर्वाचन प्रहरी आधारभूत तालिममा अनुपस्थित भएका छन्।
नेपाल प्रहरी मातहत १ लाख ३३ हजार ९ सय ८० निर्वाचन प्रहरीमध्ये २ हजार ९ सय ९५ जना तालिममा सहभागी नभएको प्रहरी प्रधान कार्यालयले जनाएको छ ।
अनुपस्थितमध्ये केहीले प्रहरी जवानको लिखित परीक्षा तथा अन्य कारण देखाउँदै केही दिनभित्र सम्बन्धित युनिटमा उपस्थित हुने जानकारी दिएका छन् भने बाँकीले कुनै सूचना नदिई अनुपस्थित रहेका छन् ।
सरकारले निर्वाचन सुरक्षाका लागि नेपाल प्रहरी, सशस्त्र प्रहरी, नेपाली सेना र राष्ट्रिय अनुसन्धान विभागबाट गरी करिब १ लाख ९० हजार सुरक्षाकर्मी परिचालन गर्ने निर्णय गरिसकेको छ ।
तालिम पूरा गरेकालाई आगामी सातादेखि फिल्डमा खटाइने तयारी छ ।
