जनकपुर, २० पुस । आर्थिक, सामाजिक तथा जातीय विभेदका कारण इतिहासको अँध्यारोमा धकेलिएका वीर सहिद बहादुर सदा केवल एक व्यक्तिको नाम मात्र नभई उत्पीडित समुदायको विद्रोही चेतना र न्यायका लागि गरिएको अमूल्य बलिदानको प्रतीक भएको नेपाल राष्ट्रिय मुसहर संघले जनाएको छ ।
वीर सहिद बहादुर सदाको स्मृतिमा वि.सं. २०८२ माघ १६ गते स्मृति सभा आयोजना गर्ने निर्णय गरिएको छ । नेपाल राष्ट्रिय मुसहर संघको आयोजनामा उक्त स्मृति सभा भव्य, सभ्य र अर्थपूर्ण रूपमा सम्पन्न गरिने संघले जानकारी दिएको छ ।
स्मृति सभा तयारीका लागि नेपाल राष्ट्रिय मुसहर संघका राष्ट्रिय अध्यक्ष चन्देश्वर सदाको अध्यक्षतामा सम्पन्न बैठकले २१ सदस्यीय मूल आयोजक समिति गठन गरेको छ ।
बैठकमा मधेश प्रदेशका सचेत मुसहर समुदायका बुद्धिजीवी, युवा, महिला, दलित अभियन्ता तथा स्थानीय राजनीतिककर्मीहरूको उल्लेखनीय उपस्थिति रहेको थियो ।
तयारी बैठकमा सहभागी वक्ताहरूले वीर सहिद बहादुर सदाको बलिदानलाई केवल स्मरणमा सीमित नराखी उत्पीडित समुदायको इतिहास, अधिकार र सम्मानका लागि निरन्तर संघर्षको प्रेरणाका रूपमा अघि बढाउनुपर्नेमा जोड दिएका थिए ।
आयोजकका अनुसार उक्त स्मृति सभा केवल औपचारिक कार्यक्रम मात्र नभई इतिहासमाथि गरिएको अन्यायको प्रश्न उठाउने, राज्यको दीर्घकालीन बेवास्ताविरुद्ध आवाज बुलन्द गर्ने तथा जातीय, सामाजिक र आर्थिक विभेदविरुद्ध संगठित संघर्षको उद्घोष हुनेछ ।
नेपाल राष्ट्रिय मुसहर संघले वीर सहिद बहादुर सदाको बलिदानलाई सम्मान गर्दै उत्पीडनमुक्त, समानता र न्यायमा आधारित समाज निर्माणका लागि सबै न्यायप्रेमी नागरिक, सामाजिक अभियन्ता र सरोकारवाला पक्षलाई स्मृति सभामा सक्रिय सहभागिताका लागि आह्वान गरेको छ ।
