काठमाडौँ १९ पुष । नेपाली कांग्रेसमा जारी १५औँ महाधिवेशनसम्बन्धी विवादबारे साझा धारणा तय गर्न डा. शेखर कोइराला पक्ष छलफलमा जुटेको छ।
विशालबजारस्थित कोइरालाको सचिवालयमा बसेको बैठकमा उपसभापति धनराज गुरुङ, सहमहामन्त्रीद्वय जीवन परियार र बद्री पाण्डे, तथा ४० भन्दा बढी केन्द्रीय सदस्यहरूको सहभागिता रहेको छ।
पार्टी कार्यसम्पादन समितिले आगामी वैशाख २८ देखि ३१ गतेसम्म १५औँ महाधिवेशन गर्ने निर्णय गरेपछि सो समूह छलफलमा जुटेको हो।
उक्त निर्णयमा महामन्त्रीद्वय गगन थापा र विश्वप्रकाश शर्मासहित पाँच जनाले फरक मत राखेका थिए। महाधिवेशनको मिति र प्रक्रिया विषयमा पार्टीभित्र अन्योलता देखिएपछि शेखर समूहको छलफललाई चासोका साथ हेरिएको छ।
