काठमाडौं, १८ पुस । नेपाली कम्युनिष्ट पार्टी (नेकपा) का संयोजक पुष्पकमल दाहाल ‘प्रचण्ड’ ले देश, जनता र संविधानको रक्षा गर्न वामपन्थी तथा समाजवादी शक्तिहरूबीच एकता अपरिहार्य भएको बताएका छन् ।
उनले पछिल्लो राजनीतिक अवस्थाबाट देशलाई निकास दिन अहिलेको सबैभन्दा उपयुक्त विकल्प निर्वाचन नै भएको स्पष्ट पारे । सङ्खुवासभाको खाँदबारीमा आयोजित नेकपा सङ्खुवासभा एकता सन्देशसभालाई सम्बोधन गर्दै संयोजक दाहालले संविधानमाथि देखिएको चुनौती र राष्ट्र संकटको अवस्थालाई ध्यानमा राख्दै समाजवादी एकताको बाटो रोजिएको बताए ।
उनले भने, “देश संकटमा परेको बेला विभाजित भएर होइन, एकताबद्ध भएर अघि बढ्नुपर्छ । संयोजक दाहालले हालै देखिएको ‘जेनजी आन्दोलन’ ले मुलुकको शासन प्रणाली, राजनीति र समग्र अवस्थाप्रति नयाँ पुस्ता सचेत, जिम्मेवार र परिवर्तनमुखी रहेको सन्देश दिएको उल्लेख गरे ।
उनले जेनजी आन्दोलनबाट उठेका सवाल र अपेक्षालाई गम्भीर रूपमा लिँदै, त्यसको उपलब्धि रक्षा गर्न नेकपा अब सच्चिएर अघि बढ्ने प्रतिबद्धता जनाए ।
