जनकपुर, १५ पुस । मधेस प्रदेश सरकारले बुधबार मन्त्रिपरिषद् विस्तार गर्ने तयारी गरेको छ । सरकार गठन भएको करिब एक महिनापछि मन्त्रिपरिषद्लाई पूर्णता दिन लागिएको हो ।
हालसम्म केही मन्त्रालय रिक्त रहँदै आएकाले सरकारको कामकारबाहीलाई प्रभावकारी बनाउन मन्त्रिपरिषद् विस्तार आवश्यक ठानिएको प्रदेश सरकारको भनाइ छ ।
मुख्यमन्त्री तथा मन्त्रिपरिषद्को कार्यालयका अनुसार मन्त्रिपरिषद् विस्तारका विषयमा सत्तारुढ दलहरूबीच अन्तिम चरणको छलफल भइरहेको छ ।
बुधबार नै सबै रिक्त मन्त्रालयमा मन्त्री नियुक्त गरी मन्त्रिमण्डललाई पूर्णता दिने तयारी गरिएको छ । प्रदेश सरकारमा हाल ६ वटा मन्त्रालय मन्त्रीविहीन अवस्थामा रहेका छन् ।
ती सबै मन्त्रालयमा सत्तारुढ गठबन्धनमा आबद्ध दलहरूबाट मन्त्री नियुक्त गरिने मुख्यमन्त्री कृष्णप्रसाद यादवले जानकारी दिए । उनका अनुसार मन्त्रालय बाँडफाँट र मन्त्री चयनबारे दलहरूबीच सहमति जुटाउने काम अन्तिम चरणमा पुगेको छ ।
मुख्यमन्त्री यादवले दलहरूसँग अन्तिम सहमतिको टुंगो लगाएपछि बुधबार नै नवनियुक्त मन्त्रीहरूको शपथग्रहण गराउने तयारी भइरहेको बताए ।
