काठमाडौं, १४ पुस । प्रतिनिधिसभा निर्वाचनका लागि समानुपातिक प्रणालीअन्तर्गत उम्मेदवारको बन्द सूची बुझाउन विभिन्न राजनीतिक दलहरू निर्वाचन आयोग पुगेका छन् ।
फाइल बोकेका दलका प्रतिनिधिहरू आज दिनभर आयोग परिसरमा देखिएको छ । २१ फागुनमा हुने प्रतिनिधिसभा निर्वाचनका लागि समानुपातिकतर्फको बन्द सूची बुझाउने आज सोमवार अन्तिम म्याद भएकाले दलहरूको आयोग परिसरमा भीड देखिएको हो ।
दलका प्रतिनिधिहरू बन्द सूची बुझाउन आवश्यक कागजात मिलाउँदै आयोग परिसरमै तयारी गरिरहेका छन् । आयोग परिसरको खुला चौरमा बसेर विभिन्न दलहरूले उम्मेदवारको बन्द सूची समेटिएका फाइलहरू व्यवस्थित गर्ने काम गरिरहेका छन् ।
निर्वाचन आयोगका अनुसार हालसम्म नेपाल मजदुर किसान पार्टी, राष्ट्रिय जनमोर्चा पार्टी, नेपाल लोकतान्त्रिक पार्टी र जनप्रिय लोकतान्त्रिक पार्टीले समानुपातिकतर्फको उम्मेदवारको बन्द सूची बुझाइसकेका छन् ।
