काठमाडौं, १४ पोष । मोरङमा गाँजा ओसारपसार नियन्त्रण गर्ने क्रममा प्रहरीले आइतबार राति पुनः हवाई फायर गरेका छन् ।
आइतबार राति केराबारी गाउँपालिका–५ लाफा टोलमा प्रहरीले एम्बुलेन्समा लुकाएर ल्याइएको गाँजा नियन्त्रणमा लिएको हो । यस घटनामा संलग्न दुई जनालाई प्रहरीले पक्राउ गरेको छ ।
प्रहरीका अनुसार धनकुटाबाट मोरङतर्फ आउँदै गरेको प्रदेश १–०६–००१ झ ०००४ नम्बरको एम्बुलेन्सलाई चेकजाँचका लागि रोकिन खोज्दा चालक र एक जना यात्रु भाग्न थालेका थिए । त्यसपछि परिस्थितिलाई नियन्त्रणमा लिन प्रहरीले एक राउण्ड हवाई फायर गरेको थियो ।
भाग्ने प्रयास गर्ने व्यक्ति धनकुटाको सहिदभूमि गाउँपालिका–६ निवासी ३५ वर्षीय निश्चल राई र साँगुरीगढी गाउँपालिका–२ का २० वर्षीय खगेन्द्र लिम्बू रहेको प्रहरीले बताए । दुवैलाई केही समयपछि नियन्त्रणमा लिइएको हो । मोरङ प्रहरी प्रमुख प्रहरी उपरीक्षक कवित कटवालका अनुसार एम्बुलेन्सभित्र करिब ४८० किलो गाँजा बरामद गरिएको छ ।
यसअघि शनिबार राति पनि मोरङको जहदा गाउँपालिका–२ तारिगामामा प्रहरीले गाँजा तस्करीमा संलग्न व्यक्तिहरूलाई नियन्त्रणमा लिन एक राउण्ड हवाई फायर गरेको थियो । उक्त घटनामा ३३० किलो गाँजासहित २४ वर्षीय अबुल हसन र ३० वर्षीय सोहेल खान नामका दुई भारतीय नागरिक पक्राउ परेका थिए । प्रहरीले गाँजा तस्करीविरुद्ध कडाइका साथ निगरानी र कारबाही जारी राखेको जनाए ।
