काठमाडौँ, १२ पुस । ललितपुरको ज्वागल क्षेत्रमा काठमाडौँ महानगरपालिकाका मेयर बालेन साहको प्रस्तावित देश विकास पार्टीको कार्यालय निर्माणको काम तीव्र गतिमा भइरहेको छ ।
हाल निर्माणाधीन उक्त घरको बाहिरी संरचना बनिरहेको छ भने भित्री कोठाहरूमा कार्यालय सञ्चालनका लागि आवश्यक सेटअपको काम पनि सुरु भइसकेको छ ।
कार्यालयका भित्री भागमा रंगरोगनको काम सम्पन्न भइसकेको छ भने फर्निचर तथा अन्य व्यवस्थापनको तयारी भइरहेको बताइएको छ ।
यद्यपि, घरको बाहिरी भागको निर्माण तथा सजावटको काम भने अझै बाँकी नै रहेको छ । स्रोतका अनुसार यदि राष्ट्रिय स्वतन्त्र पार्टी (रास्वपा)सँग सहमति नजुटेमा बालेन साहले यही कार्यालयबाट आफ्नै पार्टीको राजनीतिक गतिविधि र संगठन सञ्चालन गर्ने तयारी गरेका छन् ।
यसले बालेन साहको आगामी राजनीतिक कदमलाई थप चासोका साथ हेरिन थालेको छ । यसैबीच, पछिल्ला केही दिनदेखि बालेन साह ज्वागलमै रहेको आफ्ना नजिकका सहयोगी कुमार बेनको घरबाट विभिन्न राजनीतिक भेटघाट र छलफलहरू सञ्चालन गरिरहेका छन् ।
स्थानीय स्तरका नेताहरू, समर्थक तथा राजनीतिक व्यक्तित्वहरूसँग निरन्तर संवाद भइरहेको बताइन्छ ।
