काठमाडौं, १२ पुस । देशभर पश्चिमी वायूको आंशिक प्रभाव कायम रहेको मौसम पूर्वानुमान महाशाखाले जनाएको छ ।
यस प्रभावका कारण हाल तराईका केही स्थानमा हुस्सु तथा कुहिरो लागेको छ भने गण्डकी, कर्णाली र सुदूरपश्चिम प्रदेशमा आंशिक बदलीको अवस्था देखिएको छ ।
महाशाखाका अनुसार आज दिउँसो तराई भूभागका अधिकांश स्थानमा हुस्सु–कुहिरो लागिरहने सम्भावना छ । यसले विशेषगरी सवारी आवागमन, हवाई उडान तथा दैनिक जनजीवनमा प्रभाव पार्न सक्ने देखिएको छ ।
कर्णाली र सुदूरपश्चिम प्रदेशसँगै गण्डकी र लुम्बिनी प्रदेशका पहाडी भूभागमा आंशिक बदली रहनेछ भने बाँकी पहाडी तथा हिमाली भूभागमा मौसम मुख्यतया सफा रहने अनुमान गरिएको छ ।
त्यस्तै, आज राति पनि तराईका अधिकांश क्षेत्रमा हुस्सु लागिरहनेछ । गण्डकी र कर्णाली प्रदेशका पहाडी तथा हिमाली भूभागमा आंशिक बदलीको अवस्था रहनेछ भने अन्य पहाडी तथा हिमाली क्षेत्रहरूमा मौसम सामान्यतया सफा रहने महाशाखाले जनाएको छ ।
मौसमविद्हरूले कुहिरोका कारण दृश्यता कम हुन सक्ने भएकाले आवश्यक सतर्कता अपनाउन अनुरोध गरेका छन् ।
