काठमाडौं, ११ पुस । नेपाली कम्युनिष्ट पार्टीका संयोजक पुष्पकमल दाहाल ‘प्रचण्ड’ ले माओले देखाएको बाटो आज पनि राष्ट्रिय स्वाधीनता, उत्पीडित वर्गको मुक्ति र आत्मनिर्भर अर्थतन्त्र निर्माणका लागि व्यावहारिक मार्गदर्शन भएको बताएका छन् ।
माओत्सेतुङको १३३औँ जन्मजयन्तीको अवसरमा शुभकामना सन्देश दिँदै उनले मतभेदभन्दा माथि उठेर सम्पूर्ण क्रान्तिकारी शक्तिहरूलाई सार्वभौम, समानतामूलक र समाजवादी नेपाल निर्माणका लागि एकजुट हुन अपील गरे ।
प्रचण्डले सामन्तवाद अन्त्यको एक चरण पूरा भइसकेको उल्लेख गर्दै अब माक्र्स, लेनिन, माओ तथा नेपाली क्रान्तिकारी अनुभवलाई संश्लेषण गर्दै समाजवादी क्रान्तिको बाटोमा अघि बढ्नु आवश्यक रहेको बताए ।
अवसरवाद, वैचारिक विचलन र अराजकतावादविरुद्ध दृढ संघर्षबिना समाजवादी क्रान्ति सफल नहुने उनको धारणा छ ।
