जनकपुर, २९ कात्तिक । मधेश प्रदेशसभाको आजको बैठक असामान्य तरिकाले भवनको प्रांगणमै बसेको छ ।
उपसभामुख बबिता कुमारी राउत ईशरले नियमित प्रक्रिया अवरुद्ध भएका कारण खुला चौरमै प्रदेशसभा बैठक सञ्चालन गरेकी हुन् । बैठक बोलाउने प्रस्ताव नेपाली कांग्रेस प्रदेश संसदीय दलका नेता कृष्ण प्रसाद यादवले राखेका थिए ।
तर सभाका कर्मचारी उपस्थित नहुनु, प्रशासनिक सहयोग नपाउनु तथा अन्य प्राविधिक समस्या उत्पन्न भएको भन्दै उपसभामुख ईशरले भवनभित्र बैठक सञ्चालन गर्न नसकिने बताएकी थिइन् ।
यसैबीच, जसपा नेपालका संसदीय दलका नेता तथा पूर्वमुख्यमन्त्री सरोजकुमार यादवले ‘विधायकीय कार्य अवरुद्ध हुन नदिन’ खुला ठाउँमै बैठक बसाल्न आग्रह गरेका थिए ।
सोही प्रस्तावअनुसार प्रदेशसभाका सदस्यहरू आज प्रदेशसभा भवनको प्रांगणमै बसेर बैठक सञ्चालनमा सहभागी भए । यसअघि सात दलका प्रदेश सांसदहरू झन्डै एक घण्टासम्म भवनअगाडिको प्रांगणमा बसेर सभामुखविरुद्ध र सभाको प्रक्रियाबारे असन्तुष्टि व्यक्त गरेका थिए । 
दलका नेता सरोजकुमार यादवका अनुसार आगामी बैठक जनकपुरको रामानन्द चौकमा बस्ने तयारी भइरहेको छ । असामान्य परिस्थितिमा बसेको प्रदेशसभा बैठकले प्रदेशको राजनीतिक अवस्था थप संवेदनशील बनेको संकेत गरेको छ ।
