जनकपुर, २६ कात्तिक । धनुषा जिल्लाको हंसपुर नगरपालिका–७ नुवाखोर टोलमा एक हृदयविदारक घटनामा गहना लुट्ने उद्देश्यले छिमेकी महिलाद्वारा अर्की महिलाको हत्या भएको खुलेको छ ।
मृतक ६२ वर्षीया चन्द्रकलादेवी दास, बिन्देश्वर दास तत्माकी श्रीमती, सोमबार राति खेतमा मृत फेला परेकी थिइन् । प्रहरीले मंगलबार राति ९ बजे उनको शव घरदेखि करिब पाँच सय मिटर टाढा खेतमा भेटाएको थियो ।
धनुषाका प्रहरी प्रवक्ता डीएसपी गणेश बमका अनुसार प्रारम्भिक अनुसन्धानबाट यो घटना योजनाबद्ध हत्या भएको पुष्टि भएको छ । प्रहरीले घटनामा संलग्न आरोपमा ४५ वर्षीया पवित्रीदेवी मण्डल, स्थानीय बिहारी मण्डलकी श्रीमतीलाई पक्राउ गरेको छ ।
प्रहरीका अनुसार पवित्रीदेवीले चन्द्रकलादेवीलाई खेतमा बोलाई धारिलो हतियार ‘फुर्सा’ प्रयोग गरी हत्या गरेकी थिइन् । हत्या पछी उनले मृतकका गरगहना लुटेकी थिइन् ।
लुटिएको गहना र प्रयोग गरिएको हतियार दुवै प्रहरीले बरामद गरेको छ । घटनाको रहस्य भने पवित्रीदेवीकै बायाँ हातको चोरी औंलाको टुप्पो छिनिएको अवस्थाबाट खुलेको हो ।
प्रहरी अनुसन्धानमा उनले स्वीकार गरेकी छन् कि हत्या गर्ने क्रममा चन्द्रकलाले प्रतिकार गर्दा उनको औंला छिनिएको थियो। यही शारीरिक प्रमाणबाट उनको पहिचान पुष्टि भएको प्रहरीको भनाइ छ ।
डीएसपी बमका अनुसार, “हत्या योजनाबद्ध रूपमा गरिएको हो। आरोपीले मृतकलाई खेतमा लगेर हत्या गरेकी हुन्। घटनास्थलबाट फुर्सा र गहना बरामद भएको छ ।
पक्राउ परेकी पवित्रीदेवीविरुद्ध कर्तव्य ज्यान मुद्दा दर्ता गरिएको छ । उनलाई धनुषा जिल्ला अदालतबाट म्याद थप गरी थप अनुसन्धान भइरहेको प्रहरीले जनाएको छ ।
