काठमाडौं, २६ कात्तिक । मधेश प्रदेशका मुख्यमन्त्री सरोज यादवको नियुक्तिसम्बन्धी विवादमा सर्वोच्च अदालतले आगामी आइतबार (३० कात्तिक) प्रारम्भिक दृष्टिकोण सार्वजनिक गर्ने भएको छ ।
न्यायाधीश नित्यानन्द पाण्डेयको इजलासले मुख्यमन्त्री यादवविरुद्ध अन्तरिम आदेश जारी गर्ने कि नगर्ने भन्ने विषयमा दुवै पक्षलाई छलफलका लागि झिकाएको हो ।
गत मंगलबार सर्वोच्चले ‘सुविधा सन्तुलनको दृष्टि’ अपनाउँदै मुख्यमन्त्री यादवलाई दीर्घकालीन प्रभाव पार्ने निर्णयहरू नगर्न आदेश दिएको थियो ।
अदालतले मुख्यमन्त्री नियुक्ति, मन्त्रिपरिषद् गठनसम्बन्धी कागजातसहितको विवरण आइतबारको सुनुवाइमा पेस गर्न भनेको छ ।
कृष्णप्रसाद यादवसहित ७४ जना सांसदहरूले दायर गरेको रिटमा मुख्यमन्त्री यादवको नियुक्ति असंवैधानिक भएको दाबी गर्दै निवर्तमान मुख्यमन्त्री जितेन्द्र सोनललाई निरन्तरता दिन माग गरिएको छ ।
प्रदेश प्रमुख सुमित्रा सुवेदी भण्डारीले संविधानको धारा १६८(३) अनुसार एमाले संसदीय दलका नेता यादवलाई मुख्यमन्त्री नियुक्त गरेकी थिइन् ।
नियुक्तिअघि उनले कानुनविद्हरसँग परामर्श गरेको बताउँदै संविधानको भावनाअनुसार अघि बढ्ने आशय व्यक्त गरेकी थिइन् ।
